شاہ ولی اللہ اوران کا نظریہ انقلاب(رسالہ محمودیہ)

شاہ ولی اللہ اوران کا نظریہ انقلاب(رسالہ محمودیہ)

مصنف : عبید اللہ سندھی

صفحات: 146

شاہ ولی اﷲمحدث دہلوی (1703-1762) برصغیر پاک و ہند کے ان عظیم ترین علماء ربانیین میں سے ہیں جو غیر متنازع شخصیت کے مالک ہیں۔ وہ ہر مسلک کے مسلمانوں کے ہاں قدر کی نگاہوں سے دیکھے جاتے ہیں ان کی شہرت صرف ہندوستان گیر ہی نہیں بلکہ عالم گیر ہے ۔وہ بلاشبہ اٹھارہویں صدی کے مجدد تھے اور تاریخ کے ایک ایسے دورا ہے پر پیدا ہوئے جب زمانہ ایک نئی کروٹ لے رہا تھا، مسلم اقتدار کی سیاسی بساط لپیٹی جا رہی تھی، عقلیت پرستی اور استدلالیت کا غلبہ ہو رہا تھا۔آپ نے حجۃ اﷲ البالغہ جیسی شہرہ آفاق کتاب اور  موطا امام مالک کی شرح لکھی اورقرآن مجید کا فارسی زبان میں ترجمہ کیا۔ دوران ترجمہ شاہ صاحب کے سامنے بہت سے علوم و معارف اور مسائل و مشکلات واشگاف ہوئے ۔ شاہ صاحب نے ان کو حل کرنے کی کوشش کی اور اس کے لیے متعدد کتابیں اور رسالے لکھے ۔ترجمہ کی مشکلات کو حل کرنے کیلئے “مقدمہ در قوانین ترجمہ” کی تصنیف فرمائی۔اس کے علاوہ شاہ صاحب نے  تصوف وسلوک  ، فقہ واصول فقہ ، اجتہاد وتقلید  کے حوالے سے کئی رسائل  تالیف فرمائے ۔ زیر تبصرہ کتاب’’شاہ ولی اللہ اوران  کا نظریہ انقلاب‘‘ مولانا عبیداللہ سندھی﷫ کی عربی  کتاب ’’رسالہ محمودیہ ‘‘ کا اردو ترجمہ ہے ۔اس کتاب  میں مولانا سندھی نے امام ولی اللہ دہلوی کے ارشادات  ودعوت اور انقلابیت کی تعین  خود ان  کی تصانیف سے کی ہے اور ولی اللّہی سلسلہ کےمعروف علماء کرام کی آراء شاہ ولی اللہ دہلوی ﷫کے بارے میں  پیش کی  ہیں کہ وہ حضرت شاہ ولی اللہ کو کیا مقام دیتے ہیں ۔مولانا سندھی نے اس  کتاب کا نام ’’محمویہ‘‘ رکھا   بعد میں شیخ بشیر احمدبی اے  نے اس  کا اردو ترجمہ کیا  تو انہوں نے اس کا نام ’’ عبیدیہ ‘‘رکھ دیا ۔ ناشرین کتاب ہذا  نے  ’’ محمودیہ ‘‘ اور ’’عبیدیہ‘‘ کی  تحریروں کو یکجا  کر کے  اس کا نام  ’’شاہ ولی اللہ کا نظریہ انقلاب‘‘ تجویز کیا  تاکہ  نام ہی سے  کتاب کے مضامین کا علم  ہوجائے  جو عام قاری کے لیے  عبیدیہ  او رمحمودیہ کے نام سے مشکل تھا ۔

ڈاؤن لوڈ 1
ڈاؤن لوڈ 2
4.60 MB ڈاؤن لوڈ سائز