محمد رسول اللہ ﷺ
مصنف : عبد الخالق خلیق
صفحات: 69
اس روئے ارض پر انسانی ہدایت کے لیے حق تعالیٰ نے جن برگزیدہ بندوں کو منتخب فرمایا ہم انہیں انبیاء ورسل کی مقدس اصطلاح سے یاد کرتے ہیں اس کائنات کے انسانِ اول اور پیغمبرِاول ایک ہی شخصیت حضرت آدم کی صورت میں فریضۂ ہدایت کےلیے مبعوث ہوئے ۔ اور پھر یہ کاروانِ رسالت مختلف صدیوں اور مختلف علاقوں میں انسانی ہدایت کے فریضے ادا کرتے ہوئے پاکیزہ سیرتوں کی ایک کہکشاں ہمارے سامنے منور کردیتاہے ۔درخشندگی اور تابندگی کے اس ماحول میں ایک شخصیت خورشید جہاں تاب کی صورت میں زمانےاور زمین کی ظلمتوں کو مٹانے اورانسان کےلیے ہدایت کا آخری پیغام لے کر مبعوث ہوئی جسے محمد رسول اللہ ﷺ کہتے ہیں ۔ آج انسانیت کےپاس آسمانی ہدایت کا یہی ایک نمونہ باقی ہے۔ جسے قرآن مجید نےاسوۂ حسنہ قراردیا اور اس اسوۂ حسنہ کےحامل کی سیرت سراج منیر بن کر ظلمت کدۂ عالم میں روشنی پھیلارہی ہے ۔ رہبر انسانیت سیدنا محمد رسول اللہ ﷺ قیامت تک آنے والےانسانوں کےلیے’’اسوۂحسنہ‘‘ ہیں ۔ حضرت محمد ﷺ ہی اللہ تعالیٰ کے بعد ،وہ کامل ترین ہستی ہیں جن کی زندگی اپنے اندر عالمِ انسانیت کی مکمل رہنمائی کا پور سامان رکھتی ہے ۔ گزشتہ چودہ صدیوں میں اس ہادئ کامل ﷺ کی سیرت وصورت پر ہزاروں کتابیں اورلاکھوں مضامین لکھے جا چکے ہیں ۔اورکئی ادارے صرف سیرت نگاری پر کام کرنے کےلیےمعرض وجود میں آئے ۔اور پورے عالمِ اسلام میں سیرت النبی ﷺ کے مختلف گوشوں پر سالانہ کانفرنسوں اور سیمینار کا انعقاد بھی کیا جاتاہے جس میں مختلف اہل علم اپنے تحریری مقالات پیش کرتے ہیں۔ ہنوذ یہ سلسلہ جاری وساری ہے ۔ زیر تبصرہ کتاب ’’محمد رسول اللہﷺ ‘‘ انڈیا کے مایہ نازعالم دین مولاناعبدالخالق خلیق کی سیرت نبوی پر ایک مختصر اورجامع درسی کتاب ہے۔اس کتاب کو انہوں نے بچوں کےلیے درسی انداز میں مرتب کرتے ہوئے نبی کریم ﷺ کی پیدائش سے لے کر وفات اور تکفین وتدفین کے حالات کو 21 اسباق میں پیش کیا ہے۔ہر سبق کے آخری میں اس کی مزید وضاحت او ر اس سبق کو آسانی سے سمجھنے کے لیے سوالات بھی بنادئیے ہیں ۔اللہ تعالیٰ مصنف کی اس کاوش کو شرف قبولیت سے نوازے ۔(آمین)
| عناوین | صفحہ نمبر |
| عرض ناشر | 4 |
| مقدمہ | 7 |
| اساتذہ کرام سے چند گزارشات | 11 |
| کلمۂ طیبہ | 12 |
| پیدائش | 14 |
| شجرہ نسب | 16 |
| رشتہ دار | 18 |
| حلیۂ مبارک | 21 |
| بچپن اور جوانی | 23 |
| ازواج مطہرات | 26 |
| اولاد | 31 |
| نبوت اور اس کا مقصد | 34 |
| محمدﷺ کون تھے؟ | 36 |
| ہجرت | 38 |
| غزوات | 41 |
| آپ پر کون سی کتاب نازل ہوئی | 46 |
| عملی زندگی | 48 |
| ذکر و عبادت | 52 |
| لباس اور اکل و شرب | 55 |
| مکارم اخلاق | 58 |
| گذر بسر | 61 |
| مرض الموت اور وفات | 63 |
| تکفین و تدفین | 65 |
| ترکہ | 67 |
| نعت | 68 |
| ان کے دامن سے وابستگی چاہیے | 69 |